ڪيليفورنيا (خاص رپورٽ) آمريڪي ڪانگريس جو ميمبر، براڊ شيرمن، عالمي سطح تي مختلف ڪميٽين ۾ رهي ڪري سنڌين جي حقن جي حاصلات جي تحريڪِ لاءِ ھميشه سگهارو آواز رهيو آهي. پاڻ ڪجهه مصروفيات جي ڪري تازو ورلڊ سنڌي ڪانگريس جي 34 عالمي سنڌ ڪانفرنس ۾ نه اچي سگهيا پر ورلڊ سنڌي ڪانگريس کي لکت ۾ پنهجو پيغامِ موڪليو. براڊ شيرمن پنهنجي پيغامِ ۾ ٻوڏ ۽ برساتن ﺳﺒﺐ سنڌ ۾ جاني توڙي مالي نقصان بابت تفصيلي آنگ اکر پيش ڪري حڪومت جي ناقص ڪارڪردگي تي پنهنجي راء ڏني. پنهنجي بيان ۾ وڌيڪَ چيو ته سنڌي اهڙي وڏي نقصان ۽ تباھڪارين کان حڪومت وقت کي اڳئي آگاهه ڪري چڪا هئا پر حڪومت ان تي ڌيان نه ڌريو جنھن جي نتيجي ۾ وڏي نقصان سان گڏو گڏ قيمتي جانيون به کسجي ويون. هن وڌيڪَ لکيو ته آمريڪا ٻوڏ جي متاثرين جي سهڪار لاءِ اڳ ۾ئي 97 ملين ڊالر ڏئي چڪو آهي، وڌيڪ به مدد ڪندو رهندو. ان کان علاوه براڊ شيرمن پنهنجي خط ۾ سنڌين جي جبري مذهب مٽائڻ ۽گمشدين جو به تفصيل سان ذڪر ڪيوآهي. اُن وڌيڪ چيو ته پاڻ سنڌ جا هي مسئلا هر پليٽ فارم سان گڏ پاڪستاني حڪومتن جي نمائندن سان ڀرپور انداز۾ اٿاريا آهن. براڊ شيرمن پنهنجي پيغامِ ۾ چيو ته کيس افسوس آهي ته پاڻ ڪانفرنس ۾شامل نه ٿي سگهيو آهي. پاڻ سنڌين سان هميشه ڪلهو ڪلهي ۾ ملائي ساٿ ڏيڻ جو يقين ڏياريو ۽ ڪانفرنس لاءِ نيڪ تمنائن جو اظهار ڪيو. ورلڊ سنڌي ڪانگريس جي ٽيم ڪانگريس مَين، براڊ شيرمن جو سڄي سنڌي قوم طرفان تهه دل سان شڪريو ادا ڪري ٿي.
