ڀٽ شاهه(ن س)سنڌي ميڊيا جي سڏ تي ڀٽ شاھ جي نگري ثقافتي رنگن سان رنڱجي وئي، سنڌ ترقي پسند پارٽي پاران سنڌ سان درد جو رشتو جي عنوان سان مچ ڪچهري ۾ ڀٽائي جي راڳي فقيرن سر وکيري داد حاصل ڪيو، مقامي فنڪار فقير روشن علي ميرالي سنڌ سان درد جو رشتو ۽ فقير طالب شاهاڻي سنڌڙي تي سر ڪير نه ڏيندو ڳائي ماڻهن کي جهومائي ڇڏيو، ڀٽ شاھ جي پير محلي ۾ ايس ٽي پي اڳواڻ رحمدل مگسي جي ميزباني ۾ سنڌي ميڊيا جي سڏ تي سنڌ سان درد جو رشتو جي عنوان سان برسات ۽ ٻوڏ متاثرين سان ڏهاڙو ملهائڻ جي سلسلي ۾ مچ ڪچهري منعقد ڪئي وئي مچ ڪچهري دوران شاھ ڀٽائي جي راڳي فقيرن لياقت فقير ۽ ٻين پاران دنبوري جي تند سان شاھ جون وايون پيش ڪيون ويون، جڏهن ته مقامي فنڪارن روشن فقير ميرالي ،طالب شاهاڻي، جلال بروهي ، ملوڪ مگسي ، گلزار جتوئي، حاجي سمون ۽ ٻين پاران ثقافتي گيت پيش ڪيا ويا مچ ڪچهري ۾ فقير روشن علي ميرالي خوبصورت انداز پنهنجو تيار ڪيل گيت سنڌ سان درد جو رشتو ۽ طالب حسين شاهاڻي سنڌڙي تي سر ڪير نه ڏيندو سهندو ڪير معيار ڳائي ڀرپور خوب داد حاصل ڪيو، مچ ڪچهري دوران برسات ۽ ٻوڏ متاثرين سان يڪجهتي طور ٻن منٽن جي خاموشي اختيار ڪئي وئي، سنڌ سان درد جو رشتو جي سري هيٺ منعقد ڪيل مچ ڪچهري رات دير تائين جاري رهي جنهن ۾ پيپلزپارٽي اڳواڻ ذوالفقار سومرو، راجا حيدر بخش وساڻ، عاشق کوسو، امير علي بليدي، رجب علي بوزدار ۽ ٻين وڏي انگ شريڪ ٿي سنڌ امڙ سان محبت جو اظهار ڪيو، ان موقعي تي شاھ جي راڳي فقيرن، فنڪارن ،شهرين ۽ سياسي سماجي اڳواڻن پاران 4 ڊسمبر تي سنڌ جو ثقافتي ايڪتا ڏهاڙو ڀرپور نموني سان برسات ۽ ٻوڏ متاثرين سان گڏجي ملهائڻ جو عزم ڪيو ويو ۽ چيو ته سنڌي ميڊيا جا ٿورائتا آهيون جنهن ثقافت کي پوري دنيا ۾ متعارف ڪرايو آهي ۽ هن دفعي ايڪتا ڏهاڙي کي برسات ۽ ٻوڏ متاثرين جي نانءُ ڪري ان کي بهترين عنوان سنڌ سان درد جو رشتو سان ملهايو پيو وڃي جنهن جي ڀرپور حمايت ڪريون ٿا،
