ڪراچي (پ ر) سنڌ اڀياس اڪيڊميءَ پاران ڪالھ سنڌ جي عظيم قومي ۽ بين الاقوامي شاعر، مفڪر ۽ سوشل سائنٽسٽ شاھ عبداللطيف ڀٽائيءَ جي ”سُر ليلان چنيسر“ تي پندرھين فڪري ويھڪ سنڌ اڀياس اڪيڊمي جي ريسرچ ايسوسيئيٽس سارنگ جويي ۽ امين جويي جي ميزبانيءَ ۾ سنڌ اڀياس اڪيڊمي، زيبسٽ يونيورسٽي، ڪلفٽن، ڪراچيءَ ۾ ڪئي وئي. ھن ويھڪ ۾ شرڪت ڪندڙ شاھ لطيف جي فڪر جي شاگردن، اسڪالرن ۽ ليکڪن ڳالھائيندي چيو تہ، ”شاھ لطيف ”سُر ليلان چنيسر“ ذريعي اھو ٻُڌائڻ جي ڪوشش ڪئي آھي تہ، لالچ ۽ لوڀ اھڙيون تہ خطرناڪ ۽ خراب شيون آھن، جن جي چڪر ۾ ڦاسي اسان پنھنجو مقصد، پنھنجي منزل ۽ پنھنجو رھنما بہ وڃائي ٿا ويھون، ان ڪري پنھنجي مقصد، منزل ۽ اڳواڻ يا رھبر سان سچي محبت ڪندڙ اھو ھوندو آھي، جيڪو ڪڏھن بہ لالچ ۽ لوڀ تي نہ ھرکندو آھي، جيڪڏھن ان کان اھڙي غلطي ٿي ويندي آھي، ته وڏائي ان ۾ آھي تہ ان غلطيءَ کي تسليم ڪري ان جو ازالو ڪيو وڃي ۽ پاڻ ۾ انڪساري، نھٺائي پيدا ڪجي ته پوءِ ئي ان جو درمان ٿي سگھي ٿو ۽ ھو ٻيھر پنھنجو مقصد، منزل ۽ رھنما يا محبوب ماڻي سگھي ٿو، ڇو ته سچو رھنما يا محبوب سچائي، سادگي ۽ ڪمٽمينٽ کي پسند ڪندو آھي.“ ھن فڪري ويھڪ ۾ ڊاڪٽر مظھر ڏوتيو، ڊاڪٽر عابدہ گھانگھرو، سيما عباسي، شھربانو ڪاڪا، ايڊووڪيٽ تنوير ابڙو، اظھر ٻانڀڻ، امين جويو، سناگر جاگيراڻي، سارنگ جويو، اميت لوھاڻو شرڪت ڪئي.
