ڪراچي (بيورو) اسٽيٽ بئنڪ آف پاڪستان وياج جي شرح 3 سيڪڙو وڌائڻ جو اعلان ڪري ڇڏيو، جنهن کانپوءِ ملڪ ۾ وياج جي شرح 20 سيڪڙو تي پهچي وئي آهي. آڪٽوبر 1996 کانپوءِ ملڪ ۾ وياج جي شرح جي اها بلند ترين سطح آهي، جنوري 2022 کان هيل تائين مرڪزي بئنڪ مهانگائي تي ضابطي لاءِ وياج جي شرح ۾ 1050 بيسس پوائنٽس جي واڌ ڪري چڪي آهي. اسٽيٽ بئنڪ طرفان جاري ڪيل مانيٽري پاليسي بيان ۾ چيو ويو آهي ته وياج جي شرح 3 سيڪڙو وڌائي رهيا آهيون، جنهن کانپوءِ اها 20 سيڪڙو هوندي. مانيٽري پاليسي بيان ۾ چيو ويو آهي ته هلندڙ مالي سال مهانگائي جي شرح 27 کان 29 سيڪڙو رهندي، نومبر پاليسي اجلاس ۾ مهانگائي جي شرح 21 کان 23 سيڪڙو رهڻ جو امڪان هو، مهانگائي جا امڪان گهٽائڻ لاءِ وياج جي شرح ۾ واڌ ضروري هئي. بيان موجب ڪرنٽ اڪائونٽ خسارو ٻه ڀاڱي ٽي گهٽائي به بي يقيني جي صورتحال برقرار آهي، آءِ ايم ايف جي نائين جازي سان ننڍي مدي ۾ ڳڻتي گهٽ ٿيندي، حڪومت جي ايس ٽي، ايڪسائز ڊيوٽيز ۽ توانائي اگهه وڌايا ۽ سبسڊيز گهٽايون آهن. اسٽيٽ بئنڪ چيو آهي ته مانيٽري پاليسي ڪميٽي جو ايندڙ اجلاس 4 اپريل تي ٿيندو. واضح رهي ته آءِ ايم ايف اسٽاف ليول معاهدي کان اڳ پاڪستان کان وياج جي شرح وڌائڻ جو مطالبو ڪيو هو.
